الخميس، 1 يناير، 2009

نشجب... نعترض...... نحتج.... وبعدين
















في الاول طبعا ربنا ينصر اهل غزه وفلسطين كلها ويحررها يا رب من العدو الصهيوني وربنا يصبر اهل الشهداء جميعا وربنا يجعل الشهداء في اعلي عليين اللهم امين يا رب العالمين
مش عارفه ابداء كلامي منين بالظبط من الموقف العربي المايع بين الاحتجاج والشجب والاعتراض.
ولا من الدعاء مجرد الدعاء ربنا ياخدهم اللي بيعملوا فينا كده وياخد اليهود ولاد التييت.
ولا من الكلمات اللي بنقولها يا عيني ، يا حرام ، ربنا معاهم
ما كان من اول وعد بلفور لليهود ببناء وطن ليهم في ارض فلسطين العربيه،جم اليهود وقعدوا في الارض وهاتك يا ضرب في الفلسطينين ، وماله ربنا ينصرهم بردو مش بنعمل حاجه غير الدعاء ( طبعا انا مش بقلل من الدعاء ده نوع من انواع العباده، ولكن الله عز وجل قال " واعدوا لهم ما استطعتم من قوه ومن رباط الخيل ترهبون به عدو الله وعدوكم" مش بس ندعي ونقول ربنا ياخدهم) وبعدين نبني مسطوطنه وماله بردو ونسكت ونسكت، ومن قمه البجاحه بقي نقول دوله اسرائيل هي فين الدوله دي اصلا هما فضلوا يرددوا الكدبه لحد ما احنا العرب مع اننا عارفين انها كدبه صدقناهم وبقينا نقوا زيهم دوله اسرائيل مع ان والله مفيش دوله اصلا اسمها اسرائيل دي ارض عربيه فلسطينيه محتله من العدو الصهيوني اسمه عدو مش صاحب ارض .
والمصيبه ان اليهود بيعملوا كل حاجه علشان تحقيق هدفهم في انشاء وطن ليهم يعني هما يعملوا كل حاجه علشان وطن ليهم واحنا العرب نرضي باننا نفقد جزء من ارضنا .
ومن الحاجات اللي بتنرفذني جدا انهم خلونا نسمي الاشياء بعكس مسميتها بقينا بدل ما نقول ارض فلسطينيه محتله نقول دوله اسرائيل ، بقينا نقول علي الجهاد والمقومه والعمليات الاستشهاديه دي عمليات انتحاريه وارهاب بقينا نغير صوره المسجد الاقصي كمان ونحط بدله صوره مسجد قبه الصخره .
بكل بجاحه ولا محترمين سلام ولا عهود ولا اي نيله علي دماغهم .
حسبي الله ونعم الوكيل .

الاثنين، 22 سبتمبر، 2008

ريشه في مهب الريح



ريشه طايره في مهب الريح نسمه توديها ، عاصفه تجبها ،يمكن تقع في الطين، ويسود لونها ،ويمكن تقع في الميه وتنضف،يمكن حد يدوس عليها وهو ماشي يمكن قاصد يدوس عليها ويمكن مش قاصد،يمكن حد ياخدها يرسم بيها.


بس اللي اعرفه عنها انها كانت ريشه بيضا طاهره ، مسالمه، مكنها صفحه السما الزرقا.
كان كل حلمها تفضل في جناح العصفوره، تفضل في السما الصافيه.


مكنتش تحب تقع علي الارض .
لان مكنها السما مش الارض .
بس يا تري هي وقعت بمزجها ولا غصب عنها؟!

السبت، 2 أغسطس، 2008

من معطيات العصر الحديث وعجبي!!!


الحب من اول كلمه

اه والله من اول كلمه مش من اول نظره كان زمان الحب من اول نظره في القرن العشرين بقي الحب من اول كلمه.

غريبه دي!!!

لا مش غريبه ولا حاجه ، بتحصل كتير حاليا مع وجود وسائل الاتصال الحديثه زي النت والموبيل وغيرها من وسائل الاتصال.

اه يا جماعه يمكن الموضوع غريب شويه او جديد .

بس معظم اللي بيستخدم الانترنت عارف الكلام ده .

طيب هو بقي الحب ده ولا الاعجاب ده ناجح ولا ايه بالظبط؟

في الواقع ومن خلال وجه نظري المتواضعه مينفعش اعمم ،بمعني انه ممكن يكون في حالات ناجح وحالات لا.


بس بقي في سؤال مهم هنا بيطرح نفسه .

هل المجتمع المصري والشرقي معترف بالعلاقات عن طريق الانترنت وغيرها من وسائل الاتصال؟ولا خايفيين؟ ولامتحافظين؟

انا في الواقع معنديش جواب للسؤال ده .

بس ممكن اخمن انه الاشخاص اللي النت موجود في حياتهم بشكل مستمر بيكونوا فاهمين الجو ماشي ازاي يعني ممكن يكون منهم كتير موافقيين علي النوع ده من العلاقات مثلا زي هنا في المدونات ناس كتير تعرف ناس كتير وفي امكانيه تكوين صداقات من خلاله وهكذا.

بس ارجع واقول ان النت في القرن ده احد وسائل التعارف زي النادي والجامعه وغيرها .

ممكن يكون الناس في كويسين او مش كويسين .

علي اي حال مجتمع النت ده في الاخر شريحه من المجتمع بتعنا في الكويس وفي اللي غير كده.

يعني اللي مش كويس ده ممكن يكون شخصيه بنحتك بيها في الواقع وبردو تكون تصرفتها مش تمام وعادي.

الثلاثاء، 1 يوليو، 2008

عاوزين حل جزري


السلام عليكم يا شبااب

عاوزه اتكلم في موضوع انا عماله افكر فيه كتيييير ومش عارفه هو لسه ظاهر اليومين دول ولا هو قديم ولا ايه ؟؟؟
انا مش عارفه
هنا بقي سؤال يطرح نفسه ايه هو الموضوع ده ؟؟؟
الشبـــــــــــــــــــــــــــــاب
مش عاوزه بقي اسمع رد يحرق دمي اللي هو هما مالهم الشباب ما هما زي الفل اهم
طيب خلينا مع الرد ده للاخر هل فعلا الشباب زي الفل
احزاب . جماعات. طوائف. تطرف. انحراف. بين اقصي اليمين واقصي الشمال
مغريات كتير . ونفس ضعيفه. ومرجعيات مش واضحه اوي.
مظلومين في شغل ودراسه وترفيه.
وطاقات مكبوته مش عارفه تخرج فين وازاي.
فين القدوه .فين المرجعيه. فين المرشد.
حد بقي يقولي خليتيها سودا اوي طب هي لونها ايه لو في لون تاني حد يقولي.
عماله افكر في كل موضوع بشوفه علي حدا مش عارفه احله حد يقولي خليكي في نفسك.
ياعاااااااااااااااالم دي مشكله جيـــــــل.
عاوزيــــــــن حل جزري نعمل ايه.
معرفش انا بجد مش عارفه.

الثلاثاء، 20 مايو، 2008

الاستثمار طلع مهم جدا


في برنامج علي قناه فضائيه مش عاوزه اقول اسمها بس ما علينا

دكتور محترم في طب القصر العيني بيتكلم عن الكبد وزراعه الكبد واتكلم عن اسعار ادويه خياليه كده ،مينفعش بكل المقايس المواطن العادي انه يشتريها اصلآ حتي امي كانت قاعده جمبي قالت بتعجب الموت ارخص!!

يلا ما علينا !!!

واتكلم كمان عن بحث عن دواء جديد وصناعته وقال انه احنا كدوله مصريه مشتركه في البحث ده فلو اكتشفنا الدواء ده هيتباع لينا بسعر التكلفه علي حد قوله!!؟

وقال بردو اننا بعد كده ممكن نبيعه لاي دوله كأستثمار!!!

استثمار!!!

بجد لا تعليق هي حياه المريض بقت استثمار،علشان البني ادم يتعالج أستثمار!!

تشتري الدواء بثمه علشان تخف!!

طيب والناس الغلابه اللي تحت خط الفقر نعمل فيهم ايه ولا هما خلاص ملهمش حظ في العلاج ولا السكن ولا حتي لقمه العيش!!

بجد والله ما عارفه اقول ايه !!

ربنا يتولانا ويتولي الغلابه علشان لما الادويه تغلي ملهمش غير ربنا يدعوه علشان يخفوا

علشان اصل الدواء بقي استثمار !!!!

بس الاغرب اني مختش بالي اصلآ ان المستشفيات كمان بقت استثمار يعني ولا دواء ولا مستشفيات!!

علي رأي ماما الموت ارخص

الخميس، 15 مايو، 2008

دعوه لمراجعه النفس


نفسي بجد نكون فاهمين الاسلام مش بس مسلمين في البطاقه
ليه مش بنعمل الفرائض ونبعد عن المعاصي؟
ليه مش بنتكسف من ربنا وهو شايفنا واحنا بنعصي؟
في حين اننا بنتكسف من الناس لو شافتنا !
وبردو سبحان الله بيسترنا واحنا بنعصي واحنا بردو مش بنبطل نعصيه
هل ده معناه ان قلبنا مات
ولا ضميرنا مات
ولا ده تفاه وسطحيه
انا مش عارفه بالظبط احط اللي احنا فيه كشباب او كمسلمين تحت مسمي
مش قادره اقول بجد غير لا تعليق
ربنا يهدينا

الثلاثاء، 13 مايو، 2008

ذكريات من الزمن الجميل


انا تقريبا في السطور البسيطه دي هتكلم عن ذكريات من الزمن الجميل"ذكرياتي"اللي انا لحد دلوقتي مش قادره انساها بتفصيلها كلها محفوره في ذاكرتي زي ما تكون حصلت من لحظات.
فاكره زمان في بيت جدتي لما كنا نقعد نستني وقت رجوع جدي علشان ناخد منه الحاجه الحلوه.
فاكره البيت نظيف اوي "يوحي بالهدوء النفسي"اضاءه هاديه وواسع وجو البيت العام هادي .
وفاكره سطوح البيت مكاني المفضل لما كنت اطلع العب مع الحمامه بتاعتي اطيرها فوقفي الجو علشان تنزل تاني وفاكره وهي طايره كنت ببص عليها في السما الصافيه،كنت بحس اني في راحه نفسيه كبيره اوي يااااااااه.
وفاكره عيون جدي الفرحانه وضحتكه الحلوه وربطه علي كتفي وهو بيديني الحاجه الحلوه.
فاكره البلطوبتاعه وجيوبه الواسعه اللي كنت دايما بدور فيه علي الحاجه الحلوه.
وفاكره لا في دي بالذات مش فاكره انا عايشه في اللحظات دي كانها دلوقتي .
عيون جدتي اللي كنت لما ابص فيها احس احساس مش عارفه اوصفه ازاي .
كنت بحس بعينها بتحضني وتربط علي كتفي كنت بحس في عينها كتير بحنيه ملهاش حدود وخوف عليا ملوش حدود،كنت لما اغيب عنها وارجع كنت بحس في عينها بنظره لهفه وشوق ليا،انا كل ده بتكلم عن نظره عينها اللي انا لحد دلوقتي متاكده اني معرفتش اوصفهاكويس.
اما حضنها بقي فده كان عالم تاني " عالم خيالي".
كنت بحس في حضنها براحه غريبه ودفئ غريب وحنيه عجيبه " والاغرب ان لما جدتي ماتت الله يرحمها وانا حضنتها ونمت علي كتفها وهي ميته ومسكت ايدها حسيت نفس الاحساس !!".
كانت جدتي عندها قدره عجيبه علي احتواء اي حد وانا بكتب الكلام ده بجد مش قادره امسك دموعي .
انا حكيت كتير عن ذكريات مش هنساها باذن الله، لكن عاوزه اقول حاجه دلوقتي الوقت اللي انا بكتب فيه السطور البسيطه دي حاضر كمان شويه هيبقي ذكري اتمني اني لما افتكرها بعد كده افتكرها ذكري كويسه افرح بيها افرح بيها وعاوزه اقول يا جماعه كل لحظه في حياتنا هتبقي ذكري بعد شويه يا نفتكرها ونفرح يا نفتكرها ونحزن انا نفسي بعد عمرليا كده اكون مؤثره في حياه حد ذي جدتي ما كانت مؤثره في حياتي .
مع الاخذ في الاعتبار اني كل اللي حكيته عن جدتي كان قدرتها علي الاحتواء واحسسها باللي حوليها وحنيتها، كل الحاجات دي مش محتاجه كورسات او دورات تدريبه محتاجه بس نفهم اننا بشر عنده مشاعر ، والمشاعر دي هي اللي بتحركه.
هل احنا بنتوجع لآلآم الناس؟
هل احنا بنفكر في تصرفتنا قبل ما نعملها علشان منحرجش مشاعر حد؟
هل احنا اصلا بنحس بالناس وآلامهم؟
ولا كل واحد مش بيفكر غير في نفسه ؟!
هل واحنا بنتعامل مع الناس فهمين انهم بشروارد منهم الخطأ زي ما وارد منهم الصواب؟
هل احنا عندنا قدره علي التسامح ؟ هل احنا بنغفر للناس اخطأئهم؟
وعاوزه اقول في النهايه " من لا يرحم لا يُرحم "