السبت، 2 أغسطس 2008

من معطيات العصر الحديث وعجبي!!!


الحب من اول كلمه

اه والله من اول كلمه مش من اول نظره كان زمان الحب من اول نظره في القرن العشرين بقي الحب من اول كلمه.

غريبه دي!!!

لا مش غريبه ولا حاجه ، بتحصل كتير حاليا مع وجود وسائل الاتصال الحديثه زي النت والموبيل وغيرها من وسائل الاتصال.

اه يا جماعه يمكن الموضوع غريب شويه او جديد .

بس معظم اللي بيستخدم الانترنت عارف الكلام ده .

طيب هو بقي الحب ده ولا الاعجاب ده ناجح ولا ايه بالظبط؟

في الواقع ومن خلال وجه نظري المتواضعه مينفعش اعمم ،بمعني انه ممكن يكون في حالات ناجح وحالات لا.


بس بقي في سؤال مهم هنا بيطرح نفسه .

هل المجتمع المصري والشرقي معترف بالعلاقات عن طريق الانترنت وغيرها من وسائل الاتصال؟ولا خايفيين؟ ولامتحافظين؟

انا في الواقع معنديش جواب للسؤال ده .

بس ممكن اخمن انه الاشخاص اللي النت موجود في حياتهم بشكل مستمر بيكونوا فاهمين الجو ماشي ازاي يعني ممكن يكون منهم كتير موافقيين علي النوع ده من العلاقات مثلا زي هنا في المدونات ناس كتير تعرف ناس كتير وفي امكانيه تكوين صداقات من خلاله وهكذا.

بس ارجع واقول ان النت في القرن ده احد وسائل التعارف زي النادي والجامعه وغيرها .

ممكن يكون الناس في كويسين او مش كويسين .

علي اي حال مجتمع النت ده في الاخر شريحه من المجتمع بتعنا في الكويس وفي اللي غير كده.

يعني اللي مش كويس ده ممكن يكون شخصيه بنحتك بيها في الواقع وبردو تكون تصرفتها مش تمام وعادي.

هناك 28 تعليقًا:

عاشقة الوطن يقول...

السلام عليكم

ازيك يادديدو

موضوعك مهم جدا
هو فعلا بحبك من اول كلمة
ديه مشكلة ناس كتير
من اول ما يتعرف او تتعرف على حد خلاص انا بحبه

انتى عارفة ممكن نكون صداقات ماشي مفيش مشاكل ونتعرف على اصدقاء جدد
بس اللى مش ممكن ابدا ان الواحد يحب عن طريق النت على الرغم ان فيه ناس نجحت فى ده بس مش كتير

يعنى ازاى ممكن واحدة او واحد يحب حد من مجرد انه اتكلم معاه حبتين
يعنى احنا متعملناش مع الشخص ده وجها لوجه ولا عارفين طبعه ولا اسلوبه ولا هو بيفكر ازاى
طيب ماهو ممكن اوى يتكلم معانا بطريقة شي واخلاق ايه ودماغ مفيش بعد كده وهو فى الاصل ممكن يكون انسان مش موثوق فيه

يعنى الحب عن طريق النت غير مقنع بالمرة
لكن الصداقات ماشي مش هتعمل أزمة

ومعلش طولت عليكى
بس اموضوع بجد عاوز كلام كتير

تحياتى ياقمر

Abu Shahin يقول...

النت فعلا وسيلة للتعارف ووسيلة حلوة كمان نشوف بعديها الناس على طبيعيتها ونتعامل معاهم ف الحقيقة
انما حب عن طريق النت ازاى يعنى
مع احترانى لكل اللى بيحبوا ع النت بس ده هبل
يعنى ايه احب واحدة وانا عمرى ماشوفتها ولا شوفتها ف صورة ع الكمبيوتر هههههه ده عته يا جدعان

لا وتلاقى اللى بيحب ع النت مقتنع تماما انه بيحب و ان ده فعلا حب حقيقى
ياللا غلابه

أ / أحمد عبد المنعم يقول...

بسم الله الرحمن الرحيم
أولا أشكرك على زياراتك الجميلة لمدونتى " أمــــى " كما أشكرك على إضافتك للمدونة إلى المدونات المفضلة عندك أما بالنسبة لموضوعك :
فطرق هذه الأفكار شئ جميل ويعبر عن عقل مفكر باحث عن كل جديد , فالحب أو الإعجاب غير مرتبط بالعين والرؤية فقط بل قد تعشق الأذن قبل العين أحيانا كما قال الشاعر " فالأذن تعشق قبل العين أحيانا " وما تحدثت عنه يشير إلى نوع جديد من الحب أو الإعجاب ينشأ من الكتابة والحوار الكتابى وهنا يمكن أن نسأل ما حقيقة الحب ؟ أو الإعجاب ؟ أهو أمر فى نفس المحب ؟ أم شئ فى المحبوب ؟ أم أن المسألة هى توافق بين شئ فى نفس المحب وجدها فى المحبوب ؟ الحقيقة أن الإجابات كلها تشير إلى أن المحب هو مصدر الحب الحقيقى لذا يمكن أن نقبل بوجود هذا النوع من الحب أو الإعجاب لكن !!!! ما الذى يمكن أن ينبنى عليه نتيجة هذا الحب أو الإعجاب ؟ وهل يمكن للمحب أن يبوح بحبه ؟ ولمن يبوح ؟ وهل حب لوحة لفنان تعنى حبا حقيقيا لشخص الفنان ؟ وللحديث بقية إن أردت ..

dido يقول...

السلام عليكم يا شباب
عاشقه الوطن
منور البلوج اولا تانيا مطولتيش ولا حاجه يعني البيت بيتك اما بالنسبه لكلامك فهو تفكير منطقي وعقلي كمان بس هل الصداقه ممكن تكون بردو مع انسان من غير ما نشوفه وجها لوجه ؟؟
ـــــــــــــــــ
ابو شاهين منور البلوج بتاعتي
وكتاباتك في بلوج عيش وحلاوه رائعه يعني جامدين يا رجاله انت والشباب اللي معاك
اما بالنسبه لرايك فهو بردو تفكير منطقي بس الحب ده فعلا موجود وفعلا اللي بيكون فيه مقتنع تماما بيه
يمكن يكون صح ويمكن يكون غلط بس اللي متاكده منه انه مع التقدم في وسائل الاتصال ياما هنشوف
ـــــــــــــــــــــــ
احمد ازيك
منور البلوج بتاعتي
اولا المدونه بتاعتك رائعه جدا اقلل تقدير ليها اني احطها في مفضلاتي لاني انا المستفيده من اسلوبك الادبي وطريقه عرضك للموضوعات عموما
انا كمان معجبه بطريقه تفكيرك لاني بحب التفكير الغير تلقيدي مش بقصد المستهجن عنا ولكن احب افكر بعقل مفتوح بعيدا عن التقليديه وطبعا من حقك انك تقول رايك مهما طال لاني احب اسمعه نورت ومنتظره تعليقاتك وطول زي مانت عاوز لان كلامك يستحق ان يقرا بعنايه

elsha3er يقول...

موضوعك جميل وبجد المدونة جميلة وبعدين الحب من كلمة من نظرة المهم ان مفهوم الحب عندنا ما يتغيرش

dodda يقول...

يا ديدو ده نصيب
حتى الناس اللى بتعرفيهم من النت نصيبك
والمطلوب ان الحرص اللى بنتصرف بيه فى الحياه اليوميه يكون موجود وزياده شويه على النت

والعلاقات من النت غير مرفوضه بس لازم تكون تحت رقابه من اهل البنت لانها الطرف الاضعف للاسف
وربنا يستر

mado80 يقول...

إيه يا ديدو الكلام الجامد ده

لأ بس بجد عندك حق ، كمان دودوا عندها حق في اللي بتقوله لازم الواحد ياخد باله برضه

المهم إنتي عامله إيه يا بت يا دودا يارب تكوني بخير تبقي تطمنيني عليكي يا جميل

كل التحيه والتقدير ليكي

(المهاجر الى الله) يقول...

ادعوكى لزيارة مدونة عيون على هذا الرابط
ww.eyuon.blogspot.com
وشكرا

Nasimlibya `√ يقول...

السلام عليكم
بوستك رائع جدا
فعلا مجتمع النت غريب عجيب بس الاكيد رائع بوجود ناس زيك

غير معرف يقول...

ديدو العزيزة

كما قلت انت .. النت والشات وغيرها وسائل للتعارف تفتح آفاقا أوسع تتخطى الحدود الى ارجاء العالم كله عند اصابعك

وهذه ميزة عظيمة

وجعلناكم شعوبا وقبائل لتعارفوا ، ان اكرمكم عند الله اتقاكم

اتقاكم ببساطة يعنى المؤدبين .. وهك كثيرون .. فلماذا نحرم انفسنا من معرفتهم ؟ اما الآخرون فمن السهل الابتعاد عنهم .. كما نيتعد عن زميل فى العمل او الجامعة ..

اما الحب فهو طبعا يبدأ بكلمة .. وان استمر .. فسيتحول الافتراض تدرجيا الى حقيقة وواقع .. قد يستمر .. وقد لايستمر

زمان كانت الخاطبة .. ماهى الاخرى تنقل معلومات وصور دون اتصال مباشر بين الطرفين .. الآن الوسيلة الحديثة هى النت

نحن سنتعود على التكنولوجيا الحديثة شيئا فشيئا كالموبايل بالضبط ..

dido يقول...

السلام عليكم يا شباب
منورين البلوج

الشاعر
اهلا بيك منور البلوج وفعلا المهم مضمون الحب يجي بقي زي ما يجي
ـــــــــــــــــــــــــــــــ

دودا

اهلا بيكي يا واحه الامان المتحركه
فعلا ده نصيب ونعم بالله والحرص فعلا مطلوب طبعا عندك حق
ــــــــــــــــــــــــــــــــ

ماااااااااااادو

مش عارفه اعلق نور بقي في البلوج انك علقت ودخلت عندي من الاراضي المقدسه ولا ايه اي كلام هتقوله يا مان صح الصح وميه وميه
والله ليك وحشه كبيره مووووت ترجع بالف سلامه يا رب وربنا يحميك ويحفظك
ـــــــــــــــــــــــــــــــــ

المهاجر الي الله

اهلا بيك منور البلوج

ــــــــــــــــــــــــــــــــــ

شريف

طبعا عندك حق انا شايفه ان وسائل الاتصال دي هتفرض نفسها بعد فتره من الزمن هيبقي طبيعي جدا اننا نتجوز بالطريقه دي او نشتغل او ندرس او....

ـــــــــــــــــــــــــ

تحياتي للجميع

Herr Esharif يقول...

Ths 's 1st time 4 me here &wish nt last ... Iam enjoy 'e net world & find my self lucky cuz find friends through net was nice ppl ... Salam

أختكم فى الله يقول...

موضوع مهم جدا

فعلا بقى منتشر جامد

كل سنة وانتى طيبة يا حبيبتى

رمضان كريم

bastokka طهقانة يقول...

اللهم بلغنا رمضان و اعنا على صيامه و قيامه و اجعلنا من عتقائك من النار في هذا الشهر الفضيل
امين
أختكم
عبير عبد الشافي صاحبة مدونة طهقانة و كلبوزة لكن سمباتيك

Nasimlibya `√ يقول...

انتي وين مختفية معقولة هكي لا معايدة ولا شئ جديد
انتظرك وانتظر جديدك وكل رمضان وانت بالف خير وبصحو وسلامة يارب انتي وكل مصر
وان شاء الله الغياب يحمل اخبار سارة تنقشيها في ادراج قادم

مصري بالغربة يقول...

لا انا مش مع الحب من اول كلمة ولا من اول نظرة كمان

لان موضوع الحب ده اكبر من كده بكتير

صداقة ممكن انما حب لا طبعا

ابو على يقول...

انا بعترض

غير معرف يقول...

انا رايي زى كتير بردة
ممكن نقول اعجاب وصداقة وتعلق اه
لكن حب لا
ثانيا انا من وجهة نظرى الحب وليد عن المعاملة الحقيقية
ومعلهشي النت اكيد مش هيكون زى الجامعة او الشغل
مثلا الشغل هيعرفك هو مين من خلال تصرفاتة اسلوبة
ان كان عصبي او هادى مستواه الفكرى والاجتماعى
فطبعا قبل الحب لازم الطرفين يكونوا مناسبين تماما
لكن تخيلي اما الواحدة تحب من النت وتفؤجى انة اسلوبة غيرها خالص ودة شيء متوقع على الاقل 99%

elsha3er يقول...

اسعدنى زيارتك مدونتى

احمد الشاعر

جوجو يقول...

السلام عليكم

اسجل اول مرورى واسعدت بتشريفك مدونتى

كل سنة وانتى طيبة

بجد انا بحيكى على البوست ده بس من وجهة نظرى

ان النت ممكن نكون من عليه اصدقاء

لكن حب معتقدش ومعظم العلاقات اللى

بتبقى عن طريق النت بتبقى علاقات فاشلة

تحياتى على هذا البوست المتميز

أ / أحمد عبد المنعم يقول...

بسم الله الرحمن الرحيم
أشكرك على كلماتك الرقيقة العذبة
التى تفوح أخلاقا كريمة
أما بالنسبة لبقية حديثى
فحب اللوحة الفنية فى الحقيقة هو إعجاب بها لأنه لن ينبنى على مشاهدتها أكثر من الإطالة فيها
هكذا الكلمات الجميلة التى توحى بمشاعر فياضة
هى فى الحقيقة لوحة
والبشر ليسوا لوحات شكلية
كما أنهم ليسوا لوحات كلامية
الإنسان جسد(صورة) وفكر (عقل) وروح ( نفس )
ومهما حاول الناظر التدقيق فى اللوحة فلن يستطيع إلا إدراك الشكل وبعضا من الفكر
أما النفس فلن يرى منها إلا ما يريد صاحب اللوحة أن يبصره إياها
هكذا لوحة الكلمات
لا يمكن أن تصنع حبا حقيقيا أو صادقا
فالنفس لا تُدرَك حقيقتها إلا بلقاء النفس ومعاملتها فتؤكد تلك الصورة أو تظهرها على حقيقتها
فلا تركنى إلى الألفاظ والكلمات فى صنع حب حقيقى كامل وإن كان قادرا على رسم لوحة قريبة من الواقع

mahasen saber يقول...

اولا معرفت الناس من نت لواقع مش فارقه لان ممكن اتنيين يكونو متربيين سوا وتلاقيهم اكتر ناس بيسيئو لبعض ..
وممكن تلاقى حد تعرفيه من مدونه مثلا يحبك فى الله اكتر ما ابن خالتك يحبك مثلا..
فى الله يعنى..
اما الحب من اول نظره فمن اول اول نظره تتخبطى فى قلبك علطول كده لا مااعتقدش ..
او محصلتش معايا قوى..

مـجـنـووون يقول...

هو طبعا النت عامل زي المجتمع إلي عيشين فيه
بيكون فيه الكويس وفيه الوحش

وهو دلوقتي اساس من اساسيات الحياة ، يعني لازم نتعامل معاه ونستخدمه الأستخدام الأمثل

وطبعا مفيش حد دلوقتي بينضحك عليه ، وكله عارف يعني ايه نت ويعني ايه علاقة من علي النت

وأنا عن نفسي أعرف علاقات كتيرة نجحت وفي نفس الوقت علاقات كتيرة فشلت

المهم الصدق والإخلاص

تقبل مروري
مجنووون

Bob يقول...

هاى ديدو
اول حاجة انا معاكى اللى النت دلوقتى عامل زى الجامعة وخلافه
ولكن هل النت والموبايل وكل وسائل الاتصال المتاحة تعبر عن الواقع؟
فى الحقيقة ممكن اخد رايك فى حاجة؟
اختى كانت فى احد معسكرات الجامعة وبعدين فيه واحد كان معجب بها
بس مكلمهاش
ولكن بعد كده عرف رقم تليفونها من صحابها
وبعد كده قعد يكلمها على التليفون
واختى اعجبت بيه من كلامه
وهنا عايز اقولك انتى تعرفى تاخدى رايك فى واحد كلمتيه من التليفون فقط ولا حتى من على النت من غير متشوفيه زى مابيقولهface to face
بالنسبة لى انا شايف صعب شوية
ههههه كترت عليك بس هاعمل اية عشم
بهاء

elsha3er يقول...

هو حضرتك ما بتكتبيش مواضيع جديدة لية

احمد الشاعر

Beram ElMasry يقول...

ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف بها المسار

holyday يقول...

سلام عليك
ممكن موضوع قديم بس هو فعلا
مميز وطارح نفسه


وانا نقول انا حياه غريبه تفرض اشياء اغرب وربي ستار

تقبلي مروري
فتاة من زمن اخر

nudy يقول...

موضوع النت ده بقي منتشر جدا وعاوزة اقول ان حتي الناس بتوع الجيل القديم بيلجأو له احيانا لما يفقدوا الامل في زواج بناتهم فيروحوا مكاتب التزويج بالكمبيوتر بس يا تري البنات بتوافق انا مثلا لغاية وقت قريب مكنتش مقتنعة بس بدأت افكر بشكل مختلف واقول ليه الواحد بيجربش طريقة جديدة ويدي لنفسة فرصة في حدود انه لا يتنازل عن مبادئة وكرامته وكمان يحاول يعرف الكويس من الوحش